អាមេរិក៖ អតីតអ្នកអវកាសយានិកអាមេរិក លោក Walter Cunningham ដែលបានរួមដំណើរទៅកាន់ទីអវកាសជាមួយប្រតិបត្តិការ Apollo 7 នាឆ្នាំ១៩៦៨ បានទទួលមរណភាពហើយនៅថ្ងៃទី ០៣ ខែមករា ឆ្នាំ២០២៣ នេះ ក្នុងជន្មាយុ ៩០ឆ្នាំ។ 

លោក Walter Cunningham គឺជាសហការីរួមដំណើរជាមួយអ្នកអវកាសយានិក ២រូបផ្សេងទៀតរួមមាន លោក Walter Schirra និងលោក Donn Eisele ក្នុងបេសកកម្មរយៈពេល ១១ថ្ងៃដែលត្រូវបានធ្វើឡើងក្នុងគន្លងផែនដីទាប ដែលជាការហោះហើរសាកល្បងលើដំបូងបង្អស់របស់មនុស្សជាតិនៅក្នុងយានអវកាស Apollo ដែលក្រោយមកបាននាំមនុស្សជាតិរាប់សិបនាក់ឱ្យចុះចតលើផ្ទៃព្រះចន្ទបានជាបន្តបន្ទាប់ ចាប់ពីឆ្នាំ១៩៦៩ ដល់ឆ្នាំ ១៩៧២។ លោក Walter Cunningham គឺជាសហការីនៃយានអវកាស Apollo 7 ចុងក្រោយគេដែលបានស្លាប់ បន្ទាប់ពីលោក Donn Eisele ទទួលមរណភាពកាលពីឆ្នាំ១៩៨៧ និងលោក Walter Schirra ទទួលមរណភាពក្នុងឆ្នាំ ២០០៧។

លោក Walter Cunningham ធ្លាប់បម្រើការក្នុងជួរកងកម្លាំងទ័ពជើងទឹក និងនាវាមុជទឹកអាមរិក បានចូលនិវត្តន៍ពីកងទ័ពក្នុងឋានៈជាវរសនីយ៍ឯក មុននឹងត្រូវបានជ្រើសរើសពី NASA ក្នុងការចូលរួមជាអ្នកអវកាសយានិកកម្រិតទី៣ នៅក្នុងឆ្នាំ១៩៦៣។ ចន្លោះពេលដែលលោកចូលនិវត្តន៍ពីកងទ័ព និងមុនត្រូវបានជ្រើសរើសចូលរួមជាមួយ NASA លោក Cunningham បានបំពេញការងារជាអ្នកវិទ្យាសាស្រ្ត ដែលសិក្សាទៅលើផ្នែកការពារជាតិ និងបញ្ហាទាក់ទងនឹងដែនម៉ាញេទិចរបស់ផែនដី។

ក្នុងសេចក្តីប្រកាសមរណភាពរបស់លោក ស្ថាប័័ន NASA បានបញ្ជាក់់ថា លោក Walt Cunningham គឺជាអ្នកបើកយន្តហោះចម្បាំង អ្នករូបវិទ្យា និងជាសហគ្រិនម្នាក់ ប៉ុន្តែលើសពីនេះទៅទៀត លោកគឺជាអ្នករុករកដ៏អស្ចារ្យ៕